Komentariši

Ti daj hem to dat rovena a tu asaja!

Posted by Romane Dersija on 22/12/2011 in Dersija taro razno (Islamsko) teme

Bismillah-ir Rahman-ir Rahim

Ko Anav e Allahesoro, o Sa-Milostivo, o Sa-Milosno

O tu kova so djelan dur taro chachipe! Ti daj hem to dat rovena a tu asaja! Dodeka ti daj rodela tut, hem to dat vichini tut; tu ni shuneja len a ni pa mangeja te shunelen. Ti romni, te chave, hem te amala tane samo anglo te jacha; a o amala tane kle zdruzenikija ko harami bucha, hem o barvalipe tano to gazda. Pa, kaj nashaldilan?! Pa keda ka irane tut ko chachipe!

Prav te jacha! So dikheja? Da, odova nane shukar so dikheja akana. Ti daj hem to dat phurile, namborme tane, hem i tuga na mukelalen rahati. Dive hem rat lengoro kalbi rovela tutar, a tu ni na setineja tut olende! Tu inan lengoro jedino chavo, nanelen aver; a palem tu ake na poshtuineja len, ni mangeja len, ni pa trudineja tut te mange len. Tu lendar panda bishukar mislineja. O manusha! Dik akana so ulo tuvaja ko dunjaluko! Dik so ulo tuvaja sebepi odova so bisterdjan te daja hem te dade! Ake, ti romni chelelapese tuvaja sar mangela hem keda mangela samchi inan igrachka, a e chavenge ulan samo jek vrda kola so on vozinena len sar mangena hem keda mangena; na poshtuinena tut ni ti romni, a ni pa te chave, hem dur tane taro odova te mangen tut. A o amala kle, tu inan lenge samo taro korist, DA, odolese on tane tuvaja, odolese sose tu isi tut pare. Tu chineja e amalen parencar, hem mislindjan kaj ka mangen tut; ama na, svako olendar koristini tut. O barvalipa pa, odova tano sose tu zivineja hem sose tu buti chereja; a o barvalipa ake cherdja tut plo robi, hem phandela tut ko lancija te shaj frdel tut ko Djehennemi ko o Dive e Sudibasoro. Pa, kaj nashaldilan?! Irantu ko chachipe, se tu zivindjan ki iluzija. Kaintu za odova so cherdjan te roditelenge, se sa o pharipe hem loshnipe so astardja tut tano tuke sar kazna e Allahestar (Azze ve Djel) bash odova so cherdjan te dajake hem te dadese.

Muslimani inan pheneja, togash irantu ko Allah (Azze ve Djel)! Rode oprost te dajatar hem te dadestar, hem menin tut! Rode oprost dok isi vreme, se te djane o vreme hem o sastipe tane o najbare bucha kola so o manush na poshtuini dji keda na nashalilen (Hadisi ko Buhari) Djan, kaj nikad nane te ove spasimo ko o Dive e Sudibasoro ako produzineja te dukhave te daja hem dade.

Pamtin akava: ti daj, pa ti daj, pa ti daj; pa to dat! Dali djandjan, kaj o Pejgamberi (salAllahu ‘alejhi vessellem) phendja, kaj o Djenneti tano telo e dajakere pre (Sahih Hadisi ko Ebu Davud, Tirmizi, hem Ahmed)? Ko jek Hadisi (ko at-Taberani) prenesimoj taro jek Ashabi (radijAllahu ‘anhu) kaj mangla te djal ko Djihad ko Allahesoro Anav, pa, o Pejgamberi (salAllahu ‘alejhi vessellem) puchla le: “Dali ti daj tani djivdi?” O Ashabi phendja kaj tani djivdi, pa, o Pejgamberi (salAllahu ‘alejhi vessellem) phendja lese: “Icher tut zoraleste ko lakere pre, se o Djenneti tano odote.’” O manusha, odola te dajakere pre tane kola so ka anen tut popashe ko Allah (Azze ve Djel), hem kola so ka spasinen tut ko o Dive e Sudibasoro. To Ahireti, to Djenneti; zavisini najvishe taro odova sar ka poshtuine te daja; sar ka mangela, hem sar ka pomozinela ko zivoto. O ‘Abdullah ibn Me’sud (radijAllahu ‘anhu) phendja: “Na djanava nisavo aver delo kova so shaj te anel jeke manushe popashe ko Allah osven o delo te ove shukar te dajaja hem te respektuine la.” (el-Adab el-Mufrad Buhari 1/45) Ko aver Hadisi, prenesini o Ebu Hurejre (radijAllahu ‘anhu): “Jek manush alo e Pejgambereste (salAllahu ‘alejhi vessellem) hem puchla: ‘O Pejgamber (savs), kas valani najvishe te usluzinav? Ov (savs) phendja: ‘Te daja.’ O manush puchla, ‘A posle?’ Ov (savs) phendja: ‘Te daja.’ O manush palem puchla, ‘A posle?’ Ov (savs) phendja: ‘Te daja.’ O manush panda jek puti puchla, ‘A posle?’ O Pejgamberi (salAllahu ‘alejhi vessellem) phendja: ‘Te dade.’ (Hadisi ko Buhari, hem Muslim) Ko aver Hadisi (kote so shaj te arakipe ko Muslim) o Pejgamberi (salAllahu ‘alejhi vessellem) prokletindja odole manushe kasre so daj hem dat phurile, a ov na poshtuini len; esavko manush nane te kuvel ko Djenneti.

O sledno Hadisi (kova so shaj te arakipe ko Buhari hem Muslim) tano prenesimo taro Abdullah ibn ‘Amr (radijAllahu ‘anhu), kaj so o Pejgamberi (salAllahu ‘alejhi vessellem) phendja: “O najbare gjunahija tane: te chere Shirk, te na poshtuine te daja hem dade, te mudare, hem te svedochine hovavne.” O Ibn Me’sud (radijAllahu ‘anhu) prenesini akava Hadisi: “Puchlum e Pejgambere (salAllahu ‘alejhi vesellem), ‘Kova delo o Allah mangela najvishe? O Pejgamberi (salAllahu ‘alejhi vessellem) phendja: ‘Te klanine o namazi ko vreme.’ Pa puchlum, ‘A posle?’ Ov (savs) phendja: ‘Te ove shukar te dajaja hem dadeja.’ Pa puchlum, ‘A posle?’ Ov (savs) phendja: ‘Djihad ko Allahesoro Anav.’” (Hadisi ko Buhari, hem Muslim)

A ko aver Hadisi (kote so shaj te arakipe ko Ebu Davud, hem Tirmizi) o Abdullah ibn ‘Omer (radijAllahu ‘anhum) prenesini: “Inema jek romni koja kas so manglum, ama mo dat (o ‘Omeri [radijAllahu ‘anhu]) na mangla. Pa ov phendja mange, ‘Razvedin tut latar.’ Ama me odbindjum. O ‘Omer (radijaAllahu ‘anhu) djelo ko Pejgamberi (salAllahu ‘alejhi vessellem) hem vacherdja lese odova, pa o Pejgamberi (salAllahu ‘alejhi vessellem) phendja (mange): ‘Razvedin tut latar.’”

Djan kaj me inum tuke samo jek glasniko kova so vichini tut ko spas, kova so mangela tuke shukar; a na bishukaripe! Me nashti te prisilinav tut te svatine, samo tu shaj te svatine; ako mangeja te svatine. Pa, odolese iran tut ko Allah (Azze ve Djel), o tu kova so nashaldilan dur ki iluzija, osvestin tut, hem praktikuin o mangipe te dajake hem dadese, ako mangeja spas. Djan kaj ako mangeja spas, mora te mange len, hem to poshtuine len; a ako chereja odova, togash ka pomozine lenge da kozom so shaj, ka arakelen ko phuripe, hem ka chere Dove olenge.

Hem ko krajo, chitin akava Ajeti kova so to Devel, o Allah (Azze ve Djel) vacheri:

(Hem) To Devel odredindja: Te na obozavinen aver neshto osven Ole, hem te oven shukar tumare dajaja hem dadeja. Bilo jek olendar ili o solduj te phujron ko tumaro djivdipa; ma vacheren lenge bishukar lafija (ma vacheren lenge ni Uff), ni pa te cidenlen tumendar. Ma vazden tumaro glaso olenge, hem vacheren lenge shuze lafija. Hem anglo lende (tari milost hem respekt) mukhen tele tumare phaka, hem vacheren: “O mo Devel! Smiluintu olenge sar so smiluindjepe mange on keda inumle tikno!” (Kur’an, Sura el-Isra [17]:23-24)

Tags: , , Permalink
Komentariši

Shirk – O Najbaro Loshnipe

Posted by Romane Dersija on 24/11/2011 in Akida

(Akava Dersi panda nane dovrshimo; ama insh’Allah naskoro ka ovel)

Bismillah-ir Rahman-ir Rahim

Ko Anav e Allahesoro, o Sa-Milostivo, o Sa-Milosno

Uvod:

Djanen, kaj sa o Pejgamberija ine bichalde e Allahestar te prenesinen e manushenge Lesiri NAJGLAVNO poraka, koja so ine: Te obozavinen samo e Allahe, hem te cidenpe skroz taro Shirk. Svako Pejgamberi ine vacheri akava, pa djanen, kaj nane aver nachin te oven spasime, osven te cidentumen skroz taro Shirk. Odova vacheri o Allah (Azze ve Djel) ko Kur’ani: Obozavinen e Allahe hem NISHTO ma zdruzinen Olese. (Kur’an, Sura en-Nisa [4]:36) Isi but manusha kola so veruinena ko Devel; ama vechinom olendar cherena Shirk. But taro manusha nane svesna bash akava, a nesave pa tani hem svesna, ama sepak produzinena te plivinen ko o pani e Shirk-esoro. Odola kola so razmislinena, hem odola kola so isilen chachutno imani ko Allah (Azze ve Djel); olenge nane pharo te cidenpe taro o najbaro loshnipe – o Shirk. Akava Dersi tano odolese kova so mangela te djanel sose hem sar te arakhelpe taro akava loshnipe.

Pa CHITIN, O tu kova so rodeja o chachipe: Chitin ko Anav te Devlesoro, kova so sozdaindja (tut hem sa so postoini). (Kur’an, Sura el-Alek [96]:1) Kliknin akate te chitine celo Dersi

Tags: , Permalink
Komentariši

IHLAS

Posted by Romane Dersija on 25/09/2011 in Dersija taro razno (Islamsko) teme

Bismillah-ir Rahman-ir Rahim

Hem naredimoj olenge te obozavinen samo e Allahe, hem te oven iskrena Olese ki religija; te icherenpe chisto (ki vera); te izvrshinen o namazi, hem te den zekati. Hem odoja tani I ispravno vera. (Kur’an, Sura el-Bejjine [98]:5)

O me phrala hem phenja ko Islam, iskreno vernikija li inam? Obozavinaja li e Allahe (Azze ve Djel) iskreno (t.e. so Ihlas)? Dali pokushinaja te ova iskrena? Dali borinaja amen te postignina akaja iskrenost (Ihlas) ko amaro kalbi?

Vechinom amendar ka phenen, “Da, pokushinaja kozom so shaj te ova iskrena.” Ama, sose togash nane amen sabri hem zadovolstvo e Allahesre odredbaja keda inam pogodime teshkotijaja? Sose na inam zahvalna e Allahese (Azze ve Djel) keda Ov cidela amendar odoja teshkotija? Hem sose bistraja e Allahesere (Azze ve Djel) blagodatija keda Ov dela amenge dunjakoro barvalipa hem status?

Keda inam pogodime teshkotijaja amen bistraja e Allahesiri (Azze ve Djel) Milost hem zalinaja amen bash Lesiri odredba. Keda o Allah (Azze ve Djel) dela amenge lokhipa palo pharipa amen ovaja nezahvalna hem iranaja amen ko amare purane bilache delija. Hem keda o Allah (Azze ve Djel) dela amenge dunjakoro barvalipa, hem status, amen ake bistraja e Allahe (Azze ve Djel) skoro kompletno. Phenava skoro kompletno sose amen palem phenaja o La Illahe Illa Allah (nane nisavo aver devel osven o Allah). Ama sar tano amaro La Illahe Illa Allah iskreno keda amare delija hem nijetija tane sprotivna taro o shehadeti so vacheraja mujea?

O Allah (Azze ve Djel) vacheri ko Kur’ani: Hava sovli ko el-Asr (t.e. Vreme/Vakti)! Chache, o manush nashali; Osven odola kola so veruinena, hem cherena shukar delija, hem kola so jek javereja sovetinenape ki vistina (t.e. chachipe), hem kola so sovetinenape jek javereja ko sabri. (Kur’an, el-Asr [103]:1-3)

O me phrala hem phenja, mashkar amaro ummeti isi but hari kola so praktikuinena o Ihlas (t.e. iskrenost ko ibadeti); hem akava tano jek but seriozno buti. Ko akava amaro vreme (vakti); but amendar klaninena namazi, dena sadaka, postinena, djana ko Hadj; ama vechinom amendar chache nanelen Ihlas. Sa so valani te chera tano te dikha andre amaro kalbi, pa amari godi, hem posle amaro Ahlako (t.e. amare manirija/moralija/odnesuvanje). Keda ka dikha andre amaro kalbi, dikhaja kaj tano kalo taro o grevija so cheraja. Ljubomora hem omraza uchardja amaro kalbi, hem odolese o kalbi amaro tano akana nambormo. Keda ka dikha amare misle andre ko amari godi, ka dikha kaj isi but sheri, hem o sumnje uchardje amari godi, odolese akana amen na djanaja soj pravilno (shukar) hem soj pogreshno (bilacho). A keda pa dikhaja amaro Ahlako, amen arakaja munafluko; so znachini, kaj cheraja lafi e Allahestar (Azze ve Djel) hem Lesere Pejgamberestar (salAllahu ‘alejhi vesellem), amen vacheraja kaj sledinaja e Allahesiri Kniga (t.e. o Kur’ani) hem o Sunneti, hem amen vacheraja kaj sa odova praktikuinaja; ama amaro Ahlako sikavi kaj amen ko nishto taro odova so phenaja na ichereja amen. Kliknin akate te chitine celo Dersi

Tags: , , , Permalink
1 komentar

O MO PHRAL!

Posted by Romane Dersija on 27/08/2011 in Dersija bash o Dunjaluko, o teshkotije ko zivoto, o Dive e Sudibasoro, o Znakija e Allahesere (Azze we Djell), hem slichno

Bismillahir-Rahmanir-Rahim

Dive hem racha nakena, a palem dik vechinom taro manusha so cherena. Dik ko savo hor pani batindje andre, hem nashti te iklon avri. Nashti dikhen o dive, nashti len vazduho ; a soj najloshno tano so on na mangena te iklon avri taro pani, iako ka meren panda hari. Dik sar lengere vile achile phanle, hem korole tane hem kashuke tane; pa koj ka uputini len palo akava osven o Allah (Azze ve Djel)!?

O me phrala, pa kaj achilen? Vacheren kaj nashaldilen? Pa o shejtani asala, a sose asala? O shejtani asala odolese sose nashaldilen ko Dunjaluko. Epa sar ulo odova mo phral? Odova ulo sose tu pelan ki shejtanesiri zamka. E sar ulo odova pa!? Odova ulo sose tu nane tut Imani! A sar pa ulo odova!? Odova ulo sose nane tut cachutno djandipa, se te djane ine neshto, tu ka ovel tut ine Imani hem Takva.

O La Illahe Illa Allah, Muhammedur Resulullah

But manusha mislinena kaj o shehadeti tano dovolno te vacheripe mujea za jek manush te ovel Muslimani. Akava mislenje tano pogreshno. Odova so vacheri o shehadeti dindja amaneti e Allahese (Azze ve Djel) hem odolese mora te icheri po amaneti. A sar icheripe o amaneti? O amaneti icheripe odoleja so o Muslimani icheripe iskreno ko odova so o Allah (Azze ve Djel) vacherdja, hem ko odova so Lesoro Pejgamberi (salla’llahu ‘alejhi vessellem) phendja. A sar pa icheripe ko odova o Muslimani? Icheripe ko odova odoleja so iskreno veruini ko Kur’ani hem ko Sunneti, hem iskreno ispolnini ple duznostja sprema o Allah (Azze ve Djel), pa vacheri o Allah ko Kur’ani: Chache, odola so phenena: “Amaro Devel tano o Allah”, hem posle tane ustrajna ko odova; upro lende o melaikija hulena hem vacherena: “Ma daran, hem ma roven; nego raduinen tumen ko Djenneti kova soj tano tumenge vetuimo!” (Kur’an 41:30)

Bash akalese o Abdul Kadir Djilani phendja: “Pokushinen te haljoven tumare Devlesere Lafija, praktikuinen odola Lafija ko delo hem cheren odola delija iskreno.” (Jila’al-Kathir-Abdul Qadir Jilani, str.179 [Anglisko prevod])

Nesave manusha djele ko Hasan al-Basri hem phendjelese: “Dijek manusha phenena kaj odova so vacheri ‘La Illahe Illa Allah” kuvela ko Djenneti.” O Hasan al-Basri phendja lenge: “Odova so vacheri ‘La Illahe Illa Allah’, hem ispolnini o uslov hem duznostja taro ‘La Illahe Illa Allah’ ka kuvel ko Djenneti.”(Ma’aridjul Kabul, vol.2, str.429) Kliknin akate te chitine celo Dersi

Tags: , , , Permalink
Komentariši

Sar Te Nakhave o Pharipe ko Zivoto (Romano Dersi)

Posted by Romane Dersija on 18/07/2011 in Dersija bash o Dunjaluko, o teshkotije ko zivoto, o Dive e Sudibasoro, o Znakija e Allahesere (Azze we Djell), hem slichno

Bismillah-ir Rahman-ir Raheem

Pochminava ko Allahesoro Anav, hem slavinava e Allahe Lesere najshuze Anavencar. Molinava e Allahe te mukhel pi milost upro sa o Roma hem Muslimanija, hem rodava e Allahestar te arakima taro Lesiri kazna hem taro o waswas e shejtanesoro. Molinava e Allahe, te mukhel po Rahmeti hem Mir upro o Pejgamberi Muhammed (salla’llahu alejhi wessellem), lesiri Familija (radiAllahu ‘anhum), hem lesere Ashbaija (radiAllahu ‘anhum).

O mo phral hem mi phen ko Islam; isto sar tute, djan kaj me da inum manush kova so nashti ovel perfekt ko sa; isto sar tute, djan kaj me da isima osetja hem me da djava preku bare pharipa ko akava Dunjaluko; hem isto sar tute, me da inum jek sluga e Allahesoro, me da inum odova sluga kova so pokushini kozom shaj te sluzini e Allahese. Djan kaj me da isima greshke nekad, hem isto sar tute, me da razocharinavama nekad; ama dali znachini odova kaj valjani te bistra e Allahe, hem te muka o Islam? Dali odova znachini kaj o Allah (Azze ve Djell) kaznini amen preku muke? Na, sigurno nane odova, nego isi aver rezonija sose amen trpinaja pharipa ko akava Dunjaluko.

O mo phral hem mi phen ko Islam, ka phenav tumenge akana dijek bucha sose me mangava tumen ko Allahesoro Anav, hem samo Lesro sebepi me inum akate hem vichinava tumen palal ko Allah. Sa so vacherava tano za da te vazdavtumen taro sojbe, hem za da te djanen sose postoinena ko akava Dunjaluko. Mangava te phraven tumari godi hem vilo te shaj o Allah te pherel tumen ple Nureja, ple Svetloja. Mangava te phraven tumaro vilo te shaj o Allah (Azze ve Djell) te vodini tumen ki Peste, hem te shaj oven sigurno uzi Leste. Insh’Allah isi te djanen kaj o Allah Mangela tumen, odolese mangen Le tumen da, hem sa so ka cheren, cheren ko Lesoro Anav.

Pa shunen akana akala 3 tajne, kola so ako praktikuindjen len, ka oven but posrechna manusha. Ka vahcherav tumenge akala bucha, za da te djanen sar te nakhaven o pharipa.
Kliknin akate te chitine celo Dersi

Tags: Permalink
Komentariši

Ma ov tazno (Romano Dersi)

Posted by Romane Dersija on 21/05/2011 in Dersija taro razno (Islamsko) teme

Bismillah-ir Rahman-ir Rahim

But bersha nakle, hem tu panda inan ko isto than. Tu besheja telo odova isto kash, puchindoj tut dali nekad ka ove srechno. Tu pheneja, “Me na inum srechno. Sose trpinava muke, sose nashti te ovav srechno sar svako aver?”

Te asva perena taro te jacha, hem to vilo padjola tari i duk so trpindjan sa akala bersha. Tu osetineja tut kokori, hem odolese cideja tut taro manusha za da ma te sudinentut bash ti situacija. Hem akana, tu dikeja upre, vazdeja te vasta , hem chereja jek but shuzi Dova. E Allahe molineja hem ochekuineja odgovor Olestar.

But vakti djelo, hem tu pheneja kaj ti Dova nane odgovorimi panda. “Dali o Allah muklaman? Tu pucheja tut. “Dali o Allah Mangela man ? A ako chache Mangela man, togash sose mi Dova nane odgovorimi” palem pucheja tut. Hem akana, tu pereja ko te krochija hem vichindoj pheneja, “Kaj inan Allah?! Valjaneja mange! Valjaneja mange but.” Pa tu pochmineja akana te nashale nadez. Mangeja o Allah te pomozini tuke. Mangeja o Allah te menini ti situacija. Ko te krochija inan, hem te asva perena tutar, isto sar o brshim so perela taro o oblakija. Ama ashta, o Allah akana bichali tuke jek svetlo upral Pestar, ko to kalbi andre. “Soj akava?” pucheja tut. Osetineja mir, hem andre ki tute djaneja, kaj o Allah nesar vacheri tuke, “Sa ka ovel shukar, ma dara; ma ov tazno.”

O tu robi e Allahesoro; odolese ma ov tazno; djan kaj o Allah chache Mangela tut. O Allah (Azze we Djell) vacheri: Hem ma nashal ti nadez ki Allahesiri Milost…(Qur’an, Sura ez-Zumer, 39:53)
Kliknin akate te chitine celo Dersi

Tags: , , , , , Permalink
Komentariši

O Romalen, ushten taro sojbe! (Romano Dersi)

Posted by Romane Dersija on 21/05/2011 in Dersija taro razno (Islamsko) teme

Bismillah-ir Rahman-ir Rahim

Prenesimoj kaj o al-Fudajl bin ‘Ajjad (rahimullah) vacherdja: “Sar ka osetinentumen keda ka oven taro odola manusha kola so ka resen o vakti keda ka dikhen kaj o manusha nashti te razlikuinen chachipe taro hovajbe, verniko taro neverniko, chachutno manush taro hovavno manush, bidjando taro djando, hem (keda ka) nashti te razlikuinen ni soj shukar ni soj loshno.” (Ibn Battah, Al-Ibanah Al-Kubra 1:188)

O Romalen, dali djanena kaj akava vakti vech alo amende? Dali dikhena tumen mashkar odola manusha, so nashti vishe  te razlikuinen o shukar taro loshno? Hem dali dikhena tumen mashkar odola manusha so nashti vishe te razlikuinen e verniko taro neverniko?

O Allah te arakhel amen; djanen kaj akava vakti vech alo amende! O vakti alo, kaj so o shukar ulo loshno, a o loshno ulo shukar. O vakti alo, kaj so o djando ulo bidjando, a o bidjando ulo djando. Hem o vakti alo, kaj so o iskreno ulo hovavno, a o hovavno ulo iskreno. O Romalen, akava ovela a tumen panda sovena mislindoj kaj o suno tano chachipe. Ushten! Se o Allah (Azze we Djell) vacheri jasno: Hem isavke (manusha) penena: “Nane nisavo zivoto aver nego akava Dunjalicko zivoto, hem akate zivinaja hem akate ka mera, hem (samo) o vakti tano odova so unishtini amen”. Sepak, on na djanena nishto bash akava, hem on samo (bash akava) zamislinena pese (kaj tano tochno).  (Qur’an, Sura el-Djasie, 45:24)
Kliknin akate te chitine celo Dersi

Tags: Permalink
Komentariši

Ja Insan! (Romano Dersi)

Posted by Romane Dersija on 21/05/2011 in Dersija bash o Dunjaluko, o teshkotije ko zivoto, o Dive e Sudibasoro, o Znakija e Allahesere (Azze we Djell), hem slichno

Bismillah-ir Rahman-ir Rahim

   O manusha, pa (vacher) so cherdja tut te ove bidjando bash to Devel (o Allah), o Semilostivo? (O Allah) Kova so sozdaindjatut, hem to muj sredindjale (perfektno); ki savi forma Mangla Ov (o Allah) chichatut. Ama na! Tumen hovavena bash o Pravedno Sudiba! (Qur’an, Sura el-Infitar, 82:6-9)

O Sudno Dive avela sa popashe, a o manush panda pirela ki temnina. O znakija e Allahesere (Azze we Djell) tane svugde, a o manush palem tano bidjando bash lende. Hem e manushese tane dinde but Blagodatija taro Allah (Azze we Djell), a palem o manush tano nezahvalno hem but alchno!

   Sa popashe avela e manushengro Sudiba, a palem on negirinena odova. (Qur’an, Sura el-Enbija, 21:1)

   Ja Insan, ushti taro sojbe hem prifatin o chachipe. Tu rodeja srecha ko barvalipa hem slava, tu zavidineja odolese kova so isile palata; hem tu zavidineja okolese kole so mangenale bash lesro barvalipa.

Ja Insan, akana nakla but vakti; te bala parnile, to dikipe tano nejasno, hem te changa slabondje. Alo o vreme kaj so mora te muke akava Dunjakoro djivdipa. O melaikija e merabisoro avena ki tute, hem penena: “Iklov avri tu dusho taro to telo, to Devel tano nezadovolno tuvaja; pa amen daja tuke I novost e Djehennemesiri.”

Ja Insan, tu borisajlan cello to zivoto, te dobine odova barvalipa hem slava palo kova so ko to vilo rovindoj rodindjan. Tu dobindjan so manglan, ama dali akana inan srechno odoleja so zarabotindjan?
Kliknin akate te chitine celo Dersi

Tags: Permalink
Komentariši

Tevhid

Posted by Romane Dersija on 05/08/2011 in Akida

Bismillah-ir Rahman-ir Rahim

O Allah (Azze ve Djell) vacheri: Hem Me sozdaindjum e djinnen hem manushen samo za da te obozavinen Man. Me na rodava lendar nisavo ‘rski hem na rodava lendar te parvaren Man. (Kur’an, Sura ez-Zarijat [51]:56-57)

O tumen kola so prifatindjen o Islam sar tumari Religija, puchlen li tumen so znachini akava ajeti. Puchen tumen shukar. Odova kova so isile razum, hem kova so na tumachini o bucha sprema ple strastija, ov ka djanel so o Allah (Azze ve Djel) vacheri akale Ajeteja. Ko akava Ajeti, o Allah (Azze ve Djell) vichini amen ko Tevhid, hem zabranini amenge o Shirk. Ko akava ajeti, o Allah (Azze ve Djell) vacheri amenge jasno kaj Ov na zavisini amendar, o Allah vacheri amenge jasno odoleja, kaj Ov na zavisini taro amaro ibadeti. But manusha bunisajle ko akava ajeti, pa molinava sa e phralen te chitinen akava Dersi pazlivo te shaj haljoven.

Djanen, o Allah nikad na cherdjamen te ova lesre chave, a ni pa devela; odolese o Allah (Azze ve Djell) dindjamenge jek cel, te shaj te ovel amen znachenje ko zivoto, hem te ova Lesere verna robija. Ako primetinena shukar, svako buti ko akaja Dunja isila cel. Chak jek penkalo, isile cel; oleja te pishini o manush. Djanen kaj, sar so dindja o Allah cel sa disose ko Havaja hem ki Puv, adjar dindja amenge e manushenge da cel. Amari cel, tani te obozavina e Allahe (Azze ve Djell), samo Ole; sar so vacheri ko Ajeti, te obozavina samo Ole hem nikas hem nishto aver. O Allah (Azze ve Djell) vacheri:

Hem taro Lesere (e Allahesere) Znakija tane I rat hem o dive, hem o kham hem I mesechina. Ma pokloninen tumen (t.e. ma obozavinen) e kamese ni pa e mesechinake, nego pokloninen tumen (t.e. obozavinen) e Allahese, kova so sozdaindja olen; (cheren akava) ako obozavinena chache Ole (e Allahe). (Kur’an, Sura Fussilet [41] :37)
Kliknin akate te chitine celo Dersi
Akana dali djanena so znachini akava? Akava znachini te ova poslushna e Allahese (Azze ve Djell) ko sa o vaktija. Poslushnost, znachini te ova bogobojazna. A bogobojaznost znachini te ovel amen Takva. A Takva pa znachini te ovel amen dar taro e Allahesiri kazna, te ovel amen mangipe e Allahese, hem djanen isto kaj ako darana e Allahestar hem mangenale, togash ka cheren sa tumare delija ko Lesro (Azze ve Djell) Anav. Odova postigninipe chisto nijeteja, hem o chisto nijeti tano to ibadeti te chere ko Allahesoro anav. Djanen da isto, kaj tumare sevapija ka unishtindjon ako na pazinena tumen taro grevija. Nikad nane te oveltumen Takva osven ako na cidena tumen taro grevija.

Odolese mora te djanen kaj valjani tumari Akida (veruvanje) te osnovinen sprema Tevhid. Akaja tani I najvazno buti so valani te djanen hem te praktikuinen najshukar ko tumaro zivoto. Bizo Tevhid, te djanen kaj sa tumaro ibadeti perela. Sebepi o Tevhid o Allah (Azze ve Djell) bichaldja e Pejgamberen.  Sa o Pejgamberia inelen isto misija, i misija te vichinen e manushen ko chisto Tevhid. Te obozavina samo e Allahe, hem nikas hem nishto aver osven e Allahe (Azze ve Djell). Akana te puchamen: Soj tano Tevhid? Sar postigninipe o Tevhid?

“Soj O Tevhid?”

O Tevhid, tano podelimo ko 3 aspektija; odola tane: Tevhid-ur Rububija, Tevhid-ul Uluhija, hem Tevhid-ul Esma’ ve-Sifat.

Tevhid-ur Rububija: Tano te veruine kaj o Allah tano o edinstveno Sozdateli kova so sozdaindja sa soj ko Havaja hem ki Phuv. O Kur’ani tano pherdo Ajetencar kola so vichinena ko Tevhid-ur Rububija, jek olendar tano akava ajeti: Ov (tano) kasro so vlast pripadini ko Havaja hem ki Phuv; (Ov tano odova) kova so na prisvoindja Pese chavo, kova so ki Pi vlast na lela Pese partneri, hem (Ov tano odova) kova so sozdaindja svako buti, pa opredelindja odova sa, so mera opredelimi. (Kur’an, Sura el-Furkan [25]: 2)

Tevhid-ul Uluhija: Tano te veruine kaj absolutno niko aver na zasluzini te ovel obozavimo osven o Allah (Azze ve Djell). Akava znachini, kaj o ibadeti mora te chere samo ko Allahesoro Anav, hem samo Olese. Kova so znachini na pr., samo e Allahese te pere ki sedjda, hem nikase averese, hem nisose averese. But Ajetija isi bash akava ko Kur’ani; jek olendar tano akava Ajeti: Hem Amen svako jeke nacijake bichaldjam po jek Pejgamberi (kova so vacheri ine e manushenge ): “Obozavinen (samo) e Allahe, hem cidentumen dur taro (t.e. ma obozavinen) Tagut (t.e. sa soj loshno, shejtanija, kipija, itn.).” (Kur’an, Sura en-Nehl [16]:36)

Hem o Ajeti kote so o Allah (Azze ve Djell) vacheri amenge: Hem to Devel opredelindja: “Obozavinen SAMO Ole (e Allahe). (Kur’an, Sura el-Isra [17]:23)

Tevhid-ul Esma’ ve-Sifat: Tano te veruine kaj o Allah (Azze ve Djell) isile o najshuze Anava hem Atributija; kola so tane unikatna, kola so nane manushikane, hem kola so tane perfektna ki svako smisla e lafesiri. O Ajeti so dokazini akava tano o sledno: O najshuze Anava tane e Allahesere! Hem odolencar molinentumen Olese! (Pa) Mukhen odolen kola so obratno tumachinena o Anava Lesere. Bash odova on so cherena, isi te oven tane kaznime. (Kur’an, Sura el-Araf [7]:180)

Odola tane o 3 aspektija kola so cherena o Tevhid; pa djanen kaj bizo te veruinen hem te praktikuinen o Tevhid-ur Rububija, Tevhid-ul Uluhija, hem o Tevhid-ul Esma’ ve-Sifat nane tumen Tevhid. A shaj li te prifatindjol o ibadeti bizo Tevhid? Na mo phral, nashti. A odole puchibase, “Sar postigninipe o Tevhid”; ka penavtuke kaj odova postigninipe preku Ihsan. A soj Ihsan? O Djibril (‘alejhi selam) puchla e Pejgambere (salAllahu ‘alejhi vessellem) jek puti akava isto puchiba anglo o Ashabija (radijAllahu ‘anhum), hem o Pejgamberi (salAllahu ‘alejhi vessellem) phenjda: “Ihsan tano te obozavine e Allahe samchi ked dikheja Le, a ako nashti te dikhe Le, (togash) djan kaj Ov dikhela tut.” (Muslim)

Jasno o Ajeti (37) vacheri ki Sura Fussilet, kaj amen na smiiinaja te obozavina nishto aver osven e Allahe (Azze ve Djell). Nashti pera e mesechinake ki sedjda, ni e khamese; a te djanen pa, kaj nashti te pera ki sedjda ni manushese.  O Allah (Azze ve Djell) predupredindjamen, hem lesoro Pejgamberi (salAllahu ‘alejhi vessellem) isto phendja, kaj odova so cherela Shirk, hem merela ki isavki sostojba, lese nane nisavi oprost. O Allah (Azze ve Djell) vacheri: : Chache, o Allah na oprostini o Shirk, ama oprostini kase mangela odova soj pohari taro odova. (Kur’an, Sura an-Nisa [4]:116)

Tags: , Permalink
Komentariši

So shaj o Nijeti te cherel (Romano Dersi)

Posted by Romane Dersija on 04/06/2011 in Dersija taro razno (Islamsko) teme

Bismillah-ir Rahman-ir Rahim

E Allahesoro Pejgamberi (salla’llahu ‘alejhi vessellem) phendja: “Chache, isi ko tumaro telo andre jek mas, ako odova mas andre tano sasto, celo telo da tano sasto; ama ako odova mas andre tano nambormo, celo telo da tano nambormo; hem odova mas tano o kalbi.” (Hadisi ko Buhari)

Ko aver Hadisi prenesimoj kaj O Pejgamberi (salla’llahu ‘alejhi vessellem) phendja: “Chache, o Allah na dikhela tumare muja ili pa tumaro barvalipa; nego Ov (o Allah) dikhela tumare kalbija hem delija.” (Hadisi ko Muslim)

O tu mo phral ko Islam; ispitindjan li to kalbi, ispitindjan li te dikhe dali tano chisto andre? O kalbi kova so o Allah cherdjale tuke, dali ichereja le chisto? So dikheja andre ko to kalbi? Pheneja, “Dikhava baro melalipe.” A so dikheja panda? Pheneja, “Dikhava kaj mo kalbi tano kalo.” O mo phral, pa so cherdja te ovel adjar kalo to kalbi? Pheneja kaj na djaneja; ama O mo phral, me djanava sose tuke kalo to kalbi. Djanava taro odova so o Pejgamberi (salla’llahu ‘alejhi vessellem) phendja: “Keda jek manush cherela jek losho delo, jek kali tochka pojavinipe ko lesro kalbi; ako posle o manush rodela oprost e Allahestar, I kali tochka nashaldjola; ama ako o manush iranipe pale ko isto odova loshno delo, togash I kali tochka bajrola dji keda o kalbi na ovela skroz kalo; hem akava tano o Raani kova so o Allah phendja (ko Kur’ani):  Olengere kalbija tane ucharde loshno deloncar (Raan), sose odova on zarabotindje (Kur’an 83:14).” (Hadisi ko Nasa’I hem Tirmizi)
Kliknin akate te chitine celo Dersi

Tags: , , , Permalink
Komentariši

O Manush ko Dunjaluko (Romano Dersi)

Posted by Romane Dersija on 21/05/2011 in Dersija bash o Dunjaluko, o teshkotije ko zivoto, o Dive e Sudibasoro, o Znakija e Allahesere (Azze we Djell), hem slichno

Bismillah-ir Rahman-ir Rahim

O Allah (Azze ve Djell) vacheri : Hem o zivoto akale Dunjakoro tano samo jek kratko uzivanje. Ama but poshukar tano o cher e Ahiretesoro za odola soj al-Muttakinija (o bogobojazna). Zarem nane te razuminen?! (Kur’an, Sura el-Enam, 6:32)

   Hem isto vacheri kaj: Svako isi te merel. Hem samo ko Sudno Dive tumenge ka ovel platimo sa. Hem odova koj so ka ovel cidimo taro Djehennemi hem chivdo ko Djenneti, odovaj tano o uspeshno. O zivoto akale Dunjakoro tano samo jek kratko uzivanje. (Kur’an, Sura al-Imran, 3:185)

O manusha, osvestin tut se me inum akate te predupredinav tut bash o Allah! Akava so ka vacherav tano strogo ama odovaj tano zaradi te vichinavtut palal ko Islam. Chache dukhala e manushe keda vacheripe o chachipe tari akaja Dunjaa, pa holjani tano hem mislini kaj tano akoshlo. Epa na mo pral, me tuke inum akate jek glasniko, kova so mangela te ove ko Allahesoro drumo, hem man dukhala so inan isavko zaljubimo akale Dunjaja, odolese, irantu palal ko spas, irantu ote kaj so valjani te ove, pashe uzo Allah. Shun man shukar, shun sa so ka vacherav ; hem osvestin tut.

O manusha! Tu inan zaljubimo akale Dunjaja; hem dji akana inanle lakoro robi. Zarem na razumineja? Tu parundjan o klicho kova so shaj te pravel o udar ko to vilo, o udar kova so ka deltuke vlez dji ko Allahesoro Svetlo. Nikad nane te svatine I realnost akale Dunjakiri, osven ako na hrandeja ki puv ote kaj so parundjan o klicho; hem te arakele. Ti lopata hrandibase tano o chisto Nijeti; a o klicho tano o (Islamsko) djandipa, hem o than kaj soj parumo o klicho tano ko to vilo, pa rodele odote. Kaintu e Allahese (Azze we Djell), rode Lestar oprost, te manglan te arake o klicho kova so ka legari tut ko Allahesoro Svetlo.

Ama tu mangeja o uzivanja akale Dunjakere. Panlo inan ki akaja Dunjalichko iluzija koja so naskoro ka zavrshini, hem shtom ka zavrshini ka svatine kaj inan prokletimo ko o zatvor e Djehennemesoro. Tu borinejatut akale iluzijake, hem tu chereja lafi ko lakro anav, branineja akaja iluzija; ama I iluzija tut hovavi ko najpametno nachin, a tu na inan ni svesno ko odova! Chichatuke o lancija e Djehenemesere ko te vasta hem pre, a tu na primetineja odova; tu palem mangeja akava Dunjaluko, hem tu inan korolo hem kashuko bash o chachipe.
Kliknin akate te chitine celo Dersi

Tags: , Permalink