al-Hikma wal-Ma'rifa – Romane Dersija
Hem Me (o Allah) cherdjum e djinnen hem manushen te obozavinen Man (samo). (Kur’an, Sura ez-Zarijat, 51:52)
Ja Insan! (Romano Dersi)
Bismillah-ir Rahman-ir Rahim
O manusha, pa (vacher) so cherdja tut te ove bidjando bash to Devel (o Allah), o Semilostivo? (O Allah) Kova so sozdaindjatut, hem to muj sredindjale (perfektno); ki savi forma Mangla Ov (o Allah) chichatut. Ama na! Tumen hovavena bash o Pravedno Sudiba! (Qur’an, Sura el-Infitar, 82:6-9)
O Sudno Dive avela sa popashe, a o manush panda pirela ki temnina. O znakija e Allahesere (Azze we Djell) tane svugde, a o manush palem tano bidjando bash lende. Hem e manushese tane dinde but Blagodatija taro Allah (Azze we Djell), a palem o manush tano nezahvalno hem but alchno!
Sa popashe avela e manushengro Sudiba, a palem on negirinena odova. (Qur’an, Sura el-Enbija, 21:1)
Ja Insan, ushti taro sojbe hem prifatin o chachipe. Tu rodeja srecha ko barvalipa hem slava, tu zavidineja odolese kova so isile palata; hem tu zavidineja okolese kole so mangenale bash lesro barvalipa.
Ja Insan, akana nakla but vakti; te bala parnile, to dikipe tano nejasno, hem te changa slabondje. Alo o vreme kaj so mora te muke akava Dunjakoro djivdipa. O melaikija e merabisoro avena ki tute, hem penena: “Iklov avri tu dusho taro to telo, to Devel tano nezadovolno tuvaja; pa amen daja tuke I novost e Djehennemesiri.”
Ja Insan, tu borisajlan cello to zivoto, te dobine odova barvalipa hem slava palo kova so ko to vilo rovindoj rodindjan. Tu dobindjan so manglan, ama dali akana inan srechno odoleja so zarabotindjan?
Hem akana tu inan parumo dlaboko andre ki puv, to tan tano akana akava, kaj so isi samo temnina hem nishto aver; akate tu adjichereja o Sudno Dive, o Dive kote so ka ove sudimo za odova so sledindjan te strastija ko Dunjaluko. Tu na uspeindjan te svatine o chachipa e Dunjalukosoro.
Hem ko odova Dive, tumen ka oven puchle za odova so uzivindjen (ko akaja Dunja)! (Qur’an, Sura et-Tekasur, 102:8)
Ja Insan, akava Dive ake alo; hem ti Kniga (te delongiri) tani tuke dindi ko levo vas. Vacherdoj tuke akana: “Chitin ti Kniga, tu kokori inan dovolno sar svedoko protiv tute akava Dive.” (Qur’an, Sura el-Isra, 17:14)
Praveja ti Kniga, hem dikeja kozom te delija tane kale hem melale, lengro miris tano odova taro najloshno otrov. To muj ulo kalo, te vasta hem pre tane panle ko lancija, pa tu pereja akana ko krochija, svatindoj o chachipe ko akava Dive. Kainejatut hem peneja: “Ah teshko mange, te shaj ine te na ovel mange dindi akaja Kniga! Hem te shaj ine te na djanav sar ka ovel mo Sudiba! Ah teshko mange! O meribe te shaj ine te ovel mo kraj! Taro nisavo korist o barvalipa na ine mange! Sa so inema (i sila) (akana) nashaldili mandar!” (Qur’an, Sura el-Hakk, 69:25-29)
Ja insan, niko nashti pomizinitut akana, hem nishto nashti spasinitut taro odova so zarabotindje te vasta. To shero tano tele, hem tu kuveja ko to cher kova so cherdjanle te deloncar. To tan zivibase tano akana o Djehennemi, akava tano o tan kaj so ka beshe vechno, osven o Allah (Azze we Djell) ako na smiluinipe tuke.
Hem o Allah (Azze we Djell) vacheri: Svako isi te merel. Hem samo ko Sudno Dive isi tumenge te ovel platimo sa. Hem koj tano cidimo dur e Jagatar hem chivdo ko Djenneti, odova (manush) tano o uspeshno. (Pa djanen kaj) Akava Dunjaluchko djivdipa tano samo jek hovavno uzivanje. (Qur’an, Sura al-Imran, 3:185)
Komentija