Ma ov tazno (Romano Dersi)

Bismillah-ir Rahman-ir Rahim

But bersha nakle, hem tu panda inan ko isto than. Tu besheja telo odova isto kash, puchindoj tut dali nekad ka ove srechno. Tu pheneja, “Me na inum srechno. Sose trpinava muke, sose nashti te ovav srechno sar svako aver?”

Te asva perena taro te jacha, hem to vilo padjola tari i duk so trpindjan sa akala bersha. Tu osetineja tut kokori, hem odolese cideja tut taro manusha za da ma te sudinentut bash ti situacija. Hem akana, tu dikeja upre, vazdeja te vasta , hem chereja jek but shuzi Dova. E Allahe molineja hem ochekuineja odgovor Olestar.

But vakti djelo, hem tu pheneja kaj ti Dova nane odgovorimi panda. “Dali o Allah muklaman? Tu pucheja tut. “Dali o Allah Mangela man ? A ako chache Mangela man, togash sose mi Dova nane odgovorimi” palem pucheja tut. Hem akana, tu pereja ko te krochija hem vichindoj pheneja, “Kaj inan Allah?! Valjaneja mange! Valjaneja mange but.” Pa tu pochmineja akana te nashale nadez. Mangeja o Allah te pomozini tuke. Mangeja o Allah te menini ti situacija. Ko te krochija inan, hem te asva perena tutar, isto sar o brshim so perela taro o oblakija. Ama ashta, o Allah akana bichali tuke jek svetlo upral Pestar, ko to kalbi andre. “Soj akava?” pucheja tut. Osetineja mir, hem andre ki tute djaneja, kaj o Allah nesar vacheri tuke, “Sa ka ovel shukar, ma dara; ma ov tazno.”

O tu robi e Allahesoro; odolese ma ov tazno; djan kaj o Allah chache Mangela tut. O Allah (Azze we Djell) vacheri: Hem ma nashal ti nadez ki Allahesiri Milost…(Qur’an, Sura ez-Zumer, 39:53)

Pa ma nashal ti nadez ko Allah, hem ma rode o meribe te ovel to kraj; odolese sose o Anas (radijAllahu ‘anhu) prenesini kaj e Allahesoro Pejgamberi (salla’llahu alejhi wessellem) phendja: “Niko tumendar na valjani te rodel o meriba keda ka astaritumen dijek teshkotija. Ako astari jeke manushe teshkotija, neka vacheri, ‘O Allah, cher te zivinav ako odova tano najshukar mange, hem cher te merav ako o meriba tano najshukar mange.’”(Buhari)

   O tu robi e Allahesoro; ma mislin kaj o Allah (Azze we Djell) kazninitut odoleja so muklan bare asva, hem so to kalbi tano tazno. Djan kaj o Pejgamberi (salla’llahu alejhi wessellem) phendja: “o Allah na kaznini( tumen) tumare asvenge so perena, ni pa so tumare kalbija tane tazna…(Buhari). Hem prenesimoj kaj o Pejgamberi (salla’llahu alejhi wessellem) jek dive pochmindja te rovel, hem jek Ashabi ko anav Sa’ad (radijAllahu ‘anhu) puchlale, “O Pejgamber, soj akava?” Kova so znachini, “O Pejgamber, sose roveja?”. Hem o Pejgamberi (alejhi selam) phendjalese: “O asva tane jek Milost koja so o Allah chivela ko kalbi (vilo) Ple robesoro. A o Allah Tano Milostivo samo odole manushencar kola so tane milostiva averencar.” (Buhari)

Pa O tu robi e Allahesoro, ma ov tazno; odolese sose o Allah (Azze we Djell) chache mangela tut. A o dokaz bash odova tane o teshkotije so nakavejalen ko akava zivoto. Ma mislin kaj te teshkotije tane kazna e Allahestar, djan kaj o Pejgamberi (salla’lahu alejhi wessellem) phendja: “Keda o Allah mangela shukaripe jeke manushese, Ov dela lese teshkotije.” (Buhari) Hem ko aver Hadisi prenesimoj kaj o Pejgamberi (alejhi selam) pendja: “O najbare nagrade (e Allahestar) avena e najbare teshkotijencar. Keda o Allah Azze we Djell Mangela jeke manushe, Ov iskushinile. Sa odola kola soj tane zadovolna (e Allahesere odredbaja), dobinena Lesro shukar Zadovolstvo. A sa odola kola soj tane holjame (e Allahesere odredbaja), dobinena Lesri Holi.” (Tirmizi)

O tu robi e Allahesoro, to Devel nikad na mukla tut. Ov djanela tochno sa tutar, hem o Allah (Azze we Djell) vacheri: Nisavi teshkotija nashti te ovel, osven preku e Allahesiri dozvola. Hem ako neko veruini ko Allah, togash o Allah vodini lesro kalbi (ko pravo drumo). O Allah djanela sa. (Qur’an, Sura et-Tegabun, 64:11)

O Allah (Azze we Djell) djanela ki savi teshkotija inan, hem Ov o Azze we Djell odolese vacheri: To Devel ni na mukla tut, ni na zamrzindja tut. Hem chache, o Akhireti tano but poshukar tuke, nego o zivoto (ko akava Dunjaluko). Hem chache o Allah ka deltuke (sa soj shukar), za te ove zadovolno. (Qur’an , Sura ed-Duha, 93:3-5)

Ama akalese, o tu robi e Allahesoro: Chache, tu mora te borinetu (te ave) ko to Devel, jek teshko borba dok te sretnine Ole. (Qur’an, Sura el-Inshikak, 84:6)

O tu robi e Allahesoro, djan kaj tu nashti te ove chachutno Muslimani dok na nakeja akala teshkotije ko zivoto.  Tu nashti te kuve ko Djenneti, dok na inan testirimo (iskushimo) sprema to Imani. Hem tu nashti te dobine e Allahesoro zadovolstvo dok na trpineja akala teshkotije, sabbrea hem so ustrajnost. Tu mora te borinetu ko Allahesoro (Azze we Djell) Anav. Tu mora te ove silno Muslimani; hem akava tano postignimo preku djandipa, sabbri, hem zadovolstvo. O Ebu Hureire (radijAllahu ‘anhu) prenesindja kaj o Pejgamberi (salla’lahu alejhi wessellem) phendja: “O primer e vernikosoro tano odova tari svezo granka; koja so bandjola ki strana kaj so I bavlal phudela, ama keda I bavlal achola, I granka iranipe palem ko po than hem beshela pravo. Ko isto nachin, o verniko tano iskushimo teshkotijencar (ama trpini sabbreja dok o Allah na cidela olestar o teshkotije). Ama jek manush kova so nane bogobojazno hem tano loshno, tano sar jek but zorali granka koja so beshela zorali hem pravo dji keda o Allah na chinelala (t.e. pagelala e bavlalaja, ko odova vakti) keda Ov Mangela. (Buhari)

   O tu robi e Allahesoro, so mislineja kaj akava Hadisi znachini?

Odova znachini, kaj tu mora te oveltu sabbri, iako o teshkotije tresinenatut ki levo hem desno strana. Isto znachini kaj tu mora te prifatine e Allahesiri (Azze we Djell) odredba, te ove zadovolno odoleja so odredindja tuke ko to zivoto; hem odoleja (o Hadisi) znachini da kaj to Imani valjani te achol cvrsto (jako) hem stabilno, iako o teshkotije dena napor te pagenle (e Imane) ko ekvash. Isi chache lokipa palo svako pharipa, pa odolese pamtin akala lafija e Pejgamberesere (salla’llahu alejhi wessellem): “Djanen kaj I pobeda avela e sabbreja, olesnotija (lokipa, sastipa, barvalipa, itn.) pali teshkotija (namborimipa, chorolipa, itn.), hem lokipa palo pharipa.” (Tirmizi)

O tu robi e Allahesoro, ov sar jek planina! Ov planina hem tu nikad nane te pere. Iako o brshim perela, iako iv dela, ili pa shudri bavlal phudela; ichertu sar jek planina o tu robi e Allahesoro. Akavaj tano jek Muslimani. Akavaj tano jek verniko. Svako verniko trpini teshkotije ko zivoto, hem svako tano testirimo (iskushimo) sprema plu nivo e Imanesoro. Akaja tani jek faza kotar so svako mora te nakel ko akaja Dunja; I za da svako te dobini odova so zasluzini ko Akhireti. O Allah (Azze we Djell) vacheri bash akava:

• (O Allah) Kova so cherdja o meribe hem zivoto, te testirinitumen koj tumendar poshukar tano ko delija. Hem Ov tano o Silno hem o Oprostuvachi. (Qur’an, Sura el-Mulk, 67:2)
• O Allah sozdaindja o Havajja hem I Puv e Chachipaja, odolese te shaj svako te dobini odova so zasluzini, hem nikase nane nepravdina te cherelpe. (Qur’an, Sura el-Djasie, 45:22)
• O zivoto ko akaja Dunja tano samo jek (kratko) uzivanje. Ama but poshukar tano o cher e Akhiretesoro za odola soj al-Muttakkinija (o bogobojazna). Zarem nane te svatinen? (Qur’an el-En’am, 6:32)

Chitin shukar, o tu robi e Allahesoro; keda o Ashabija (radijAllahu ‘anhu) puchle e Pejgambere (salla’llahu alejhi wessellem) bash koj tano pogodimo najvishe teshkotijencar ko zivoto, ov o alejhi selam phendja: “(Najvishe tane pogodime teshkotijencar) O Pejgamberija, posle o pravilna (chachutne) vernikija, pa odola kola so tane najshukar pali lende, pa odola kola so tane najshukar palo akala. O manush tano testirimo (iskushimo ko zivoto) sprema plo Imani. Pa ako lesro Imani tano baro, lesro testi (iskushenie) da tano pobaro ; a ako lesro Imani tano tikno, lesro testi da tano potikno. Hem o verniko tano testirimo dji keda na pirela ki Puv bizo grevija (so znachini, kaj lesre grevija ka oven ochistime odole teshkotijencar kola so trpindja sabbreja). (Buhari)

   O tu robi e Allahesoro, tu puchejatut sose trpineja teshkotije; pa djan kaj isi but sebepija bash akava, hem akala desh (10) poente tane o najbare sebepija sose tu sar verniko inan but povishe testirimo (iskushimo) nego jek neverniko:

1. 1.      Te shaj o Allah (Azze we Djell) te thovel ti dusha, to kalbi, taro grevija (znachi, te cidel tutar o grevija):

• Ebu Sa’id hem Ebu Hureire (radijAllahu ‘anhu) prenesinena kaj o Pejgamberi (salla’llahu alejhi wessellem) phendja: “Nane nijek umor, nambormipa, sekiracija (dar), duk, hem taga, kova so nakavi jek Muslmani, pa chak dji jek bocka da te posaville; osven o Allah odoleja te cidel o grevija olestar (so znachini, preku teshkotije o Allah cidela e Muslimanesere grevija). (Buhari)
• Ebu Hureire (radijAllahu ‘anhu) prenesini kaj o Pejgamberi (salla’llahu alejhi wessellem), pendja: “Teshkotije ka pogodinen e vernikon, murshen hem djuvlen, ko lengere tela, ko lengere familije, hem ko lengoro barvalipa, dji keda na sretninena e Allahe (Azze we Djell) bizo grevija.” (Buhari) Hem ko aver slichno Hadisi, dodaimo tano: “(teshkotije ka pogodinen e vernikon) …hem ko lengere chave…”

1. 2.      Te shaj o Allah (Azze we Djell) te sikavi tut sabbri, hem te shaj nagradini tut bash odova. Hem o sabbri tano o najshukar znako e Imanesoro:

• …Hem odola (manusha) kola so tane es-Sabbirin (odola so isilen sabbri, kola so tane strpliva) ko baro chorolipa hem bolest, hem ko vakti borbakoro. Akala manusha tane chachutne, hem on tane o el-Muttakun (o bogobojazna). (Qur’an, Sura el-Bekara, 2:177)
• Prenesimoj kaj o Pejgamberi (salla’llahu alejhi wesellem) phendja: “Kozom prekrasna tane o bucha e Muslimanesere! Sa o bucha lesere tane shukar. (Odolese sose) Keda tano ko vakti lokhiphasoro, ov tano zahvalno e Allahese, hem odova tano shukar olese. Hem keda tano ko vakti pharipasoro, ov trpini (I teshkotija) sabbreja hem so ustrajnost, a odova tano isto da shukar olese.” (Buhari)
• Prenesimoj kaj o Pejgamberi (salla’llahu alejhi wesellem) phendja: “O sabbri avela trpibaja.” (Darukutni Hasan Sahih)
• Prenesimoj kaj o Pejgamberi (salla’llahu alejhi wesellem) phendja: “O najshukar (delo) taro Imani tano o sabbri, hem te ove bogobojazno zoralo ki godi hem ko kalbi. (Ahmed, Sahih)

1. 3.      Te shaj o Allah (Azze we Djell) te anel tut popashe ki Peste, hem te shaj te dobine e Allahesoro Mangipe. A akava postigninipe preku odova so ka ove poslushno e Allahese (Azze we Djell), razmislidnoj ko Allahesere Znakija, odoleja so ka chere ibadeti, hem odoleja kova so ka komanduine o shukar, hem ka zabranine o loshno.

• Chache! O Ewlije (o pashe amala) e Allahesere, nane ni te ovellen dar hem ni nane te oven tazna. Odola so veruinena, hem kola so darana  ine e Allahestar but (t.e. odoleja so inelen bari Takwa, odoleja so komanduindje o shukar, hem zabranindje o loshno; hem odoleja so cidisajle taro grevija hem cherche but ibadeti). Olenge isi shukar novost, ko akava zivoto hem ko Ahireti. Nisavi izmena nashti ovel ko Allahesere Lafija (niko nashti menini e Allahesere Lafija). Hem akava tano chache o najbaro uspeh. (Qur’an, Sura Junus, 10:62-64)
• Ebu Hureire (radijAllahu ‘anhu) prenesini kaj o Pejgamberi (salla’llahu alejhi wessellem) phendja, kaj o Allah (Azze we Djell) vacherdja: “Me Inum pashe ko me robesere misle dji keda Mo robi mislini ki Mande, hem Me inum oleja dji keda ov setinipe ki Mande. Hem ako setinipe ki Mande ko plo kalbi, me da isto setinava Man ki leste ko Mlo Kalbi. Hem ako setinipe ki Mande ki jek grupa, Me setinava Man ki leste ki grupa koja so tani poshukar nego odoja lesri. Hem ako avela pashe ki Mande kozom jek vas, Me djava pashe ki leste kozom jek kubiko. Hem ako ov avela pashe ki Mande kozom jek kubiko, Me djava pashe ki leste kozom duj pravde musija. Hem ako pirela tano ki Mande, Me prastava ki leste.” (Buhari)
• Ebu Hureire (radijAllahu ‘anhu) prenesini kaj o Pejgamberi (salla’llahu alejhi wessellem) phendja : ”Keda o Allah mangela jeke manushe, Ov vichini e Djibrile vacherindoj olese: ‘Me Mangava akale filan-filan manushe, pa odolese mangle tu da O Djibril!’ Pa o Djibrili da posle mangelale, hem djala tano ko Djenneti hem phenela ote sarinenge: ‘o Allah mangela akale filan-filan manushe, odolese mangenle tumen da!’ Pa sarine da soj ko Djenneti mangena le, hem posle mangenale da o (pravedno) manusha ku Phuv.” (Buhari)
• O Ibn Abbas (radijAllahu ‘anhu) prenesini kaj o Pejgamberi (salla’llahu alejhi wessellem) phendja akava Hadisi Kudsi: “O Pejgamberi Dawud (alejhi selam), puchla e Allahe: ‘Kova taro kle robija tano Tuke najmanglo?’ O Allah vacherdjalese: ‘O Dawud, o najmanglo Mange tano odova robi kova soj tano chisto kalbeja hem chisto vastencar, kova so ni greshini nekase ni cherela lafi palo dumo nekastar. Ako o planine tane pomestime, ov na pomestinipe. Ov mangela Man, hem mangela odolen kola so mangena Man, hem cherela tano te Mangav Me roben.’ O Dawud puchla (posle): ‘O mo Devel, Tu djaneja kaj me mangava Tut, hem mangava odolen kola so mangena Tut, ama sar shaj te cherav Tu te Mange Te roben?’ Pa o Allah vacherdja lese: ‘Setincherlen ko Mle Blagodatija, Mle testija (iskushenija) teshkoijencar, hem Mi Holi. O Dawud, nijek robi Mlo nashti te pomozini ili te shtetini jeke manushese, ili pa te pirel odole manusheja ko muke; bizo Me te garantirinav lesre pre, ko odova Dive keda o pre ka oven cidime.” (Bajhaki hem Ibn Asakir)

1. 4.      Te shaj o Allah (Azze we Djell) te vazdel to status (to stepen ko Djenneti), hem ako zasluzineja tu ka dobine o Djennet-ul Firdous, preku Allahesiri Milost. Akava tano postignimo so bari borba (Djihad) ko Allahesoro (Azze we Djell) Anav, hem so baro sabbri hem ustrajnost ko teshkotije:

• Sa o manusha ka oven ko stepenja (nivoa) zavisno taro odova so cherdje. Hem to Devel nane nesvesno bash odova so cherena. (Qur’an, Sura el-Enam, 6:132)
• …o Allah ka vazdel ko (bare) stepenja (nivoa) odolen tumendar kola so veruinena hem kase soj dindo o djandipe. (Qur’an, Sura el-Mudjadele, 58:11)
• Anas (radijAllahu ‘anhu) prenesini kaj o Pejgamberi (salla’llahu alejhi wessellem) phendja: “I velichina e nagradakiri zavisini taro i velichina e teshkotijakiri. Hem keda o Allah mangela jeke manushe,  Ov delalese teshkotije…(Tirmizi, Sahih)
• Aisha (radijAllahu ‘anha) prenesini kaj jek puti, (baro) namborimbipa astardja e Pejgambere (salla'llahu alejhi vessellem), pa pashlilo ko kreveti sebepi i but bari duk so inele. Pa oj (i Aisha) phendjalese: “Te cherel ine nekoj amendar adjar, tu ine ka pishtine lese.” Ov (o alejhi selam) posle phendja lake: “Chache, e pravilno vernikosiri teshkotija tani (but) pobari; hem keda jek verniko tano pogodimo teshkotijaja, pa (i teshkotija) i te ovel sar bocka bari, ili pa pobari nego odova,  jek grevo tano cidimo olestar, hem vazdimo tano da jek stepen poupre (ko Djenneti).”(Ahmed, Hakim, Sahih)

1. 5.      Te shaj o Allah (Azze ve Djell) te razlikuini (t.e. te dokazini) e verniko taro munafiko hem kjafiri (neverniko):

• Za o Allah te odvoini (dokazini) o loshno (neverniko, politeisti, zulumkjari, itn.) taro o shukar (verniko, odola so cherena shukar delija, itn.), hem (posle) te chivel e loshno (nevernikon, politeisten, zulumkjaren, itn.) jek upro aver, te chedel len sa hem te frdellen ko Djehennemi. Odola! (Odola) Tane odola so ka nashalen (t.e. so ka oven gubitnikija). (Kur’an, Sura el-Enfal, 8:37)
• (Hem) Te shaj Ov (o Allah) te chivel e murshen hem e djuvlen soj tane vernikija ko Gradine (bavche) kote so isi lenja (t.e. Djenneti); ote te beshen tane za uvek, hem te shaj te oprostini lengere grevija, a odova tano ko Allah jek (but) bari pobeda (uspeh). (Kur’an, Sura el-Feth, 48:5)
• (Hem) Te shaj Ov (o Allah) te kaznini e murshen hem djuvlen soj tane munafikija, hem odole murshen hem djuvlen soj tane politeistija, kola so mislinena loshno e Allahestar. Neka iranipe lenge (togash) o loshnipa. O Allah Holjandja upri lende, pa (odolese) prokletindja len, hem spremindja lenge o Djehennemi; but loshno tano odova sar than. (Kur’an, Sura el-Feth, 48:6)

1. 6.      Te shaj o Allah (Azze we Djell) te pomozin to Imani te ovel jako sar jek planina, hem te bajracheri ti Takwa (bogobojaznost):

• Ebu Hureire (radijAllahu ‘anhu) prenesini kaj o Pejgamberi (salla’llahu alejhi wessellem) pendja: “O jako verniko tano poshukar nego o slabo verniko, hem o solduj tane shukar…(Muslim)
• Hem o Allah ka chivel odolen so isilen Takwa ko uspeshna (bare) thana; hem nane te astarilen nisavo loshnipa, hem nane te taguinen (nane te oven tazna). (Kur’an, Sura ez-Zumer, 39:60)
• O najshukar (manush) anglo Allah tano odova (verniko) kova so isile najbari Takwa. (Kur’an, Sura el-Hudjurat, 49:13)
• Ebu Hureire (radijAllahu ‘anhu) prenesini kaj o Pejgamberi (salla’llahu alejhi wessellem) ine puchlo: “Kola tane o najshukar manusha?” Hem o Pejgamberi (alejhi selam) phendja: “O najshukar manusha anglo Allah tane odola kola so icherena pi dolznost sprema Leste hem so darana Lestar (t.e. so isilen Takwa)…” (Buhari)

1. 7.      Te shaj o Allah (Azze ve Djell) te pomozini tut te ove mudro (djando), hem akava tano jek taro najshukar Blagodatija e Allahesere (Azze ve Djell):

• Ov (o Allah) dela al-Hikma (mudrost, djandipa) kase so Mangela; a odolese kase soj tano dindo al-Hikma, chache odole (manushese) tano dindo neizmerno (bizo kraj) shukaripa (Blagodati). Ama nikoj nane te haljoj I Poraka (e Allahesiri) osven o manusha so isilen razum. (Kur’an, Sura el-Bekara, 2:269)

1. 8.      Te shaj o Allah (Azze ve Djell) te araki tut tari pobari teshkotija. Hem ti Dova tani o najshukar ibadeti, kova so ka (cherel) o Allah te araki tut hem te spasini tut taro (pobare) teshkotije (insh’Allah).

• Chache, mo Weli (Zashtitniko, Pomoshniko, Pordzniko, itn.) tano o Allah, kova so objavindja I Kniga (o Kur’ani), hem Ov araki (hem pomozini) e (pravilno) vernikon. (Kur’an, Sura el-Araf, 7:196)
• O Allah ka arakitumen taro manusha. Chache, o Allah na uputini e manushen so na veruinena. (Kur’an, Sura el-Maida, 5:67)
• Prenesimoj kaj o Pejgamberi (salla’llahu alejhi wessellem) phendja: “I Dova tani taro korist ko bucha so ule, hem ko bucha kola so na ule panda. I teshkotija avela (napadini), ama I Dova avela ki odbrana hem borinipe olaja (e teshkotijaja) dji keda na ovela o Dive e Sudibasoro.” (Hakim)
• Prenesimoj kaj o Pejgamberi (salla’llahu alejhi wessellem) phendja: “Nishto nane poshukar anglo Allah nego I Dova.” (Sahih al-Djami, Hadis br.5268)
• Hem prenesimoj ko aver Sahih Hadisi kaj o Pejgamberi (salla’llahu alejhi wessellem) phendja: “O najshukar ibadeti tano I Dova.” (Sahih al-Djami, hadis br.1133)
• Djebir (raijAllahu ‘anhu) prenesini kaj o Pejgamberi (salla’llahu alejhi wessellem) phendja: “Odova(manush) kova so cherela Dova e Allahese, o Allah ka ispolnini lesiri Dova ili pa ka zameninila teshkotijaja; osven ako I Dova tani povrzimi grevoja ili pa (ako tani povrzimi) pagibaja o relacije ( e familijaja, komshijencar, itn.). (Tirmizi)

1. Te shaj o Allah (Azze ve Djell) te pomozini tut te razumine ti cel ko zivoto hem te ispolnine la.

• Hem Me (o Allah) cherdjum e djinnen hem manushen te obozavinen Man (samo). (Kur’an, Sura ez-Zarijat, 51:52)
• Na! Obozavin (samo) e Allahe (hem nikas avere), hem ov jek taro odola soj tane zahvalna. (Kur’ani, Sura ez-Zumer, 39:66)

1. Te shaj o Allah (Azze ve Djell) te pomozini tut te chive ti doverba ki Leste, te ove zadovolno ko zivoto; hem te prifatine Lesiri Odredba:

• ‘Omer ibn al-Hatab prenesini kaj o Pejgamberi (salla’llahu ‘alejhi wesellem) phendja: “Te chichen tumari doverba ko Allah sar so valjani te chiven, Ov (o Allah) ka obezbedini tumenge sar so obezbedini e chiriklenge, kola so djana tane bokale rano sabale, hem iranenape rachate perde vodjencar (t.e. djana te roden maro sabajle ko bokalo vodji, hem iranenape rachate perde vodjeja, hem o Allah obezbedini lenge dji keda on rodena o maro).” (Tirmizi, Ibn Madja)
• ‘Amr ibn al-As (radijAllahu ‘anhu) prenesini kaj o Pejgamberi (salla’llahu alejhi wessellem) phendja: “Odova manush tano uspeshno kova so prifatindja o Islam, hem kova so tano zadovolno odoleja so o Allah dindjalese; a olese dindoj tano dovolno kozom so valani lese (te prezivini).” (Muslim)
• Prenesimo tano kaj o Pejgamberi (salla’llahu alejhi wessellem) phendja: “Chache, svako buchake isi jek chachipa, hem e verniko na ovela le Imani dji keda na razumini kaj odova so astardjale nikad na bi nashela lestar ine, hem odova so nashla lestar nikad na bi astarile ine (t.e. odova so ulo lese tano odredimo te ovel lese, a odova so na ulo lese nikad na ine odredimo te ovel lese).” (Sahih al-Jami as-Saghir wa Zijadatuh)
• Ebu Hureire (radijAllahu ‘anhu) prenesini kaj o Pejgamberi (salla’llahu alejhi wessellem) phendja: ““O jako verniko tano poshukar nego o slabo verniko, hem o solduj tane shukar. Odolese cheren odova so ka ovel tumenge taro korist ko Ahireti, hem roden pomosh samo e Allahestar hem ma oven tazna. Ako nesavi teshkotija astari tumen, ma vacheren, ‘Te cherav ine averchane ka ovel ine poshukar”, nego penen, ‘o Allah cherdja odova so odredindja”, a tumaro ‘Te cherav ine…’ pravela o udar e shejtanese. (Muslim)

O tu robi e Allahesoro, akala desh poente tane samo nekozom taro o sebepija sose isitut teshkotije. Pamtin akava, o Allah (Azze ve Djell) vacheri: Hem shaj te na mange neshto, ama odovaj tano shukar tuke; hem shaj te mange da neshto ama odovaj tano loshno tuke. O Allah Djanela, ama tu na djaneja. (Kur’an, Sura el-Bekara, 2:216)

Shaj akala teshkotije dichona tuke sar neshto loshno, ama ola tane vsushnost Milost e Allahestar dji tute. Milost koja so tani garavdi. Ama tu ka djane, vremeja o rezultati tari akaja Milost. Ma predaintut, hem ma gubin nadez, cher Dove, hem veruin kaj o Allah ka cherel kabuli te Dove. Prenesini o Ebu Hureire (radijAllahu ‘anhu) kaj o Pejgamberi (salla’llahu alejhi wessellem) phendja: “Cher Dova hem ov sigurno kaj o Allah ka cherel kabuli ti Dova. Hem (djan) o Allah na cherela kabuli jek Dova taro (manush kova so isile) nesigurno kalbi, kova so na koncetririnipe (t.e. kova so nane iskreno). (Tirmizi)

O tu robi e Allahesoro, icher te nijetija chista, hem borintut ko Allahesoro (Azze ve Djell) Anav, te shaj te dobine e Allahesoro Zadovolstvo, Mangipe, hem Milost. O Kur’ani neka ovel ko to desno vas, hem o Sunneti neka ovel ko to levo vas. O Kur’ani neka ovel o Nuri (Svetlo) ko to kalbi, ti godi neka perdjol djandipaja hem so mudrost, hem o Allah (Azze ve Djell) neka vodini tut ko o Sirat al-Mustekim (o pravo drumo). Keda ka pobedine protiv te strastija, hem keda ka phere to kalbi e Allahesere Svetloja hem Mangipaja; togash nishto nane te chivel tut ki zabluda. Nishto nashti te cherel te predaine tut taro Allah. Hem tu ka ove jek planina koja so nishto nashti peravila. Ichertu zoraleste ko o shelo e Allahesoro, ichertu zoraleste ko o shelo kova soj cherdo tari Lesiri Milost, hem tu ka ove uspeshno ko akava zivoto hem ko Ahireti.

Ma ov tazno; hem setintut ko Allah (Azze ve Djell); setintut ko Lesere Blagodatija, hem ov zahvalno e Allahese. Arak to sastipa, hem rode o djandipa; se akala duj bucha tane Blagodatija so nanelen cena. Chiv ti doverba ko Allah (Azze ve Djell), veruin ki Leste hem ki Lesiri Milost. Djan kaj o Allah nikad nane te mukel tut, dji keda tu Ole na mukeja. Pa koristin to vreme ko shukar, hem ma troshin to vreme ko nekorisna hem loshna bucha, kola so nane te koristinentuke ko Ahireti, nego panda ka shtetinen tuke. Te djane kaj bash akalese o Pejgamberi (salla’llahu alejhi wessellem) phendja: “Isi duj blagodatija kola so but manusha na koristinena (ko shukar), odolaj tane: o sastipa hem o slobodno vreme. (Buhari)

O tu robi e Allahesoro, siklov taro svako buti so desinipe tuke ko zivoto, ko akava baro Dnujaluchko testi kote so saj tano iskushenie amenge. Pa zashtitintu protiv o Dunjaluko hem protiv o shejtani, e sabbreja hem djandipaja. Se djan, kaj o Dunjaluko tano jek bari stapica kote so o shejtani vichni tut dive hem rat te pere ani late. A odova kova so ka araki tut taro akaja stapica tano nikoj aver osve o Allah (Azze ve Djell). Pa odolese, rode o djandipa ko Kur’ani hem Sunneti, hem rode e Allahestar o sabbri. O Imani na avela nikastar averestar osven e Allahestar, a Ov o Azze ve Djell dela akava preku djandipa. Pa neka ovel o Djandipa to oruzje, hem o sabbri neka ovel to shtiti; kolencar so ka zashtitine tut ko akava Dunjaluko. O djandipa hem o sabbri tane duj bare Blagodatija kola so avena samo e Allahestar, pa uvek ov zahvalno odolese, hem ma taguin bash odova so nane tut, sose odova te ovel tut, shaj bi ovela poloshno tuke. Ov zahvalno za odova so isitut, hem zivin ko Allahesoro Anav, hem sa so ka chere, cher ko Allahesoro Anav.

Pamtin akala lafija taro ‘Ali bin Abi Talib (radijAllahu ‘anhu), kova so pendja preku jek lil e Ash’atese: “Ako inan tazno, togash tu zasluzineja milost, ama ako sikaveja sabbri, togash o Allah ka del tuke neshto ko tan odolese so nashaldjan.  Hem djan, kaj ako sikaveja sabbri, sa soj tuke odredimo(e Allahestar) ka ovel, hem tu ka ove nagradimo (za klo sabbri so ine tut). Ama ako zalineja tut hem nashaleja nadez, togash (djan) kaj isto sa soj tuke odredimo ka ovel, ama nane te ove nagradimo, hem panda ka ove krivo za odova so na ine tut sabbri ki Allahesiri odredba.” (Gems and Jewels, taro Abdul-Malik Mudjahid, st. 59)

Neka o Allah (Azze ve Djell) blagoslovini tut , neka smiluinipe tuke, neka del tuke lokhipa palo to pharipa, hem neka nagradini tut za klo sabbri hem borba ko Lesoro (Azze ve Djell) Anav, Amin!

Hem neka ovel e Allahesoro mir hem blagoslov upro o Pejgamberi (salla’lahu ‘alejhi wessellem), lesri Familija (radijAllahu ‘anhu); hem lesere Ashabija (radijAllahu ‘anhu).

Odgovori Poništi odgovor

Ovdje upišite vaš komentar...

Fill in your details below or click an icon to log in:

Email (neophodno) (Address never made public)

Ime (neophodno)

Web stranica

You are commenting using your WordPress.com account. ( Odjava / Promijeni )

You are commenting using your Twitter account. ( Odjava / Promijeni )

You are commenting using your Facebook account. ( Odjava / Promijeni )

Poništi

Konektovanje na %s

Obavijesti me putem emaila o narednim komentarima.