al-Hikma wal-Ma'rifa – Romane Dersija
Hem Me (o Allah) cherdjum e djinnen hem manushen te obozavinen Man (samo). (Kur’an, Sura ez-Zarijat, 51:52)
O MO PHRAL!
Bismillahir-Rahmanir-Rahim
Dive hem racha nakena, a palem dik vechinom taro manusha so cherena. Dik ko savo hor pani batindje andre, hem nashti te iklon avri. Nashti dikhen o dive, nashti len vazduho ; a soj najloshno tano so on na mangena te iklon avri taro pani, iako ka meren panda hari. Dik sar lengere vile achile phanle, hem korole tane hem kashuke tane; pa koj ka uputini len palo akava osven o Allah (Azze ve Djel)!?
O me phrala, pa kaj achilen? Vacheren kaj nashaldilen? Pa o shejtani asala, a sose asala? O shejtani asala odolese sose nashaldilen ko Dunjaluko. Epa sar ulo odova mo phral? Odova ulo sose tu pelan ki shejtanesiri zamka. E sar ulo odova pa!? Odova ulo sose tu nane tut Imani! A sar pa ulo odova!? Odova ulo sose nane tut cachutno djandipa, se te djane ine neshto, tu ka ovel tut ine Imani hem Takva.
O La Illahe Illa Allah, Muhammedur Resulullah
But manusha mislinena kaj o shehadeti tano dovolno te vacheripe mujea za jek manush te ovel Muslimani. Akava mislenje tano pogreshno. Odova so vacheri o shehadeti dindja amaneti e Allahese (Azze ve Djel) hem odolese mora te icheri po amaneti. A sar icheripe o amaneti? O amaneti icheripe odoleja so o Muslimani icheripe iskreno ko odova so o Allah (Azze ve Djel) vacherdja, hem ko odova so Lesoro Pejgamberi (salla’llahu ‘alejhi vessellem) phendja. A sar pa icheripe ko odova o Muslimani? Icheripe ko odova odoleja so iskreno veruini ko Kur’ani hem ko Sunneti, hem iskreno ispolnini ple duznostja sprema o Allah (Azze ve Djel), pa vacheri o Allah ko Kur’ani: Chache, odola so phenena: “Amaro Devel tano o Allah”, hem posle tane ustrajna ko odova; upro lende o melaikija hulena hem vacherena: “Ma daran, hem ma roven; nego raduinen tumen ko Djenneti kova soj tano tumenge vetuimo!” (Kur’an 41:30)
Bash akalese o Abdul Kadir Djilani phendja: “Pokushinen te haljoven tumare Devlesere Lafija, praktikuinen odola Lafija ko delo hem cheren odola delija iskreno.” (Jila’al-Kathir-Abdul Qadir Jilani, str.179 [Anglisko prevod])
Nesave manusha djele ko Hasan al-Basri hem phendjelese: “Dijek manusha phenena kaj odova so vacheri ‘La Illahe Illa Allah” kuvela ko Djenneti.” O Hasan al-Basri phendja lenge: “Odova so vacheri ‘La Illahe Illa Allah’, hem ispolnini o uslov hem duznostja taro ‘La Illahe Illa Allah’ ka kuvel ko Djenneti.”(Ma’aridjul Kabul, vol.2, str.429)
A sar ispolnini jek manush o uslov hem duznostja taro La illahe Illa Allah? Vacherdoj but shukar ki Kniga e Allahesiri (Azze ve Djel) hem ko Sunneti e Pejgamberesoro (salla’llahu ‘alejhi vessellem); kaj jek Muslimani mora te ovelle Takva, akava znachini kaj mora te mangel e Allahe (Azze ve Djel) hem ko isto vreme te daral Olestar. A nikad nane te ovel e Muslimane Takva dji keda na cherela ibadeti samo ko Allahesoro Anav, hem dji keda na cidelape taro loshnipe. O Muslimani cherela ibadeti ko Allahesoro Anav odolese sose mangela e Allahe (Azze ve Djel); hem o Muslimani cidelape taro loshnipe odolese sose darala tari Allahesiri kazna. A o Muslimani darala e Allahestar odolese sose djanela kaj valjani te iklol anglo o Allah (Azze ve Djel) ko Dive e Sudibasoro, hem tegani ka ovel sudimo za svako misla so inele, za svako lafi so vacherdja, hem za svako delo so cherdja. Akalese o Muslimani so phenela o shehadeti cidelape taro loshnipa.
Odolese o mo phral, o shehadeti mora te svatine ozbilno; odova tano Amaneti kova so deja te Devlese, e Allahese (Azze ve Djel); pa ucvrstin tut Takvaja, hem ichertu ko to Amaneti se te djane ako phaglan o Amaneti odova tano but phari buti hem o Allah (Azze ve Djel) ka kazninitut osven ako na rodeja oprost Lestar, pa o Allah tano Semilostivo.
Pazintu taro o Dunjaluko hem setin tut ko o Dive e Sudibasoro
Shunen o Abdul Kadir Djilani so phenela: “O munafikija tane robija e manushenge, robija e barvalipase…robija e barvale kralengere hem sultanenge; a neprijatelia tane odole manushese kova so vichini e manushen ko Allah (Azze ve Djel), neprijatelija tane e manushese kova so uputini e manushen ko Allah (Azze ve Djel), hem neprijatelija tane odole manushese kova so sikavi savo loshnipe o munafikija cherena. A o vernikia, o vernikia tane stalno pe Devleja, ko pharipe hem ko shukaripe, ko sastipe hem ko nambormipe, ko chorolipe hem ko barvalipe, keda o manusha chedenape mashkar lende hem keda o manusha cidenape olendar; hem ko sa o vaktija (on tane vernikija). E vernikongere kalbija na cidenape taro po Devel, ni za jek momenti. O vernikija predainenape (kompletno pe Devlese), poslushna tane (e Devlese), hem zadovolna tane (pe Devleja).O vernikija na rasprainenape (bash po Devel hem lesiri odredba)…”(Jilal al-Kathir-Abdul Qadir Jilani, str. 167 [Anglisko verzija])
Ponuduri o Abdul Kadir Djilani vacheri: “Kainen tumen akana sarine sa tumare kalbeja. Setinen tumen ko meribe hem sa so avela palo meribe. O Pejgamberi (salla’llahu ‘alejhi vessellem) phendja: ‘Setinen tumen chesto ko odova so mudari o zadovolstva…’, Odova so setinipe ko meribe ka sastjari po Nefsi taro namborimipe hem ka anel shukaripe pe kalbese. Odova so bistrela o meribe lesoro kalbi ovela zoralo hem mrzalo, posle nashti te cherel ibadeti; hem posle dikhela e manushen hem mislini kaj on shaj te anen lese lohsnipe hem shukaripe…Teshko tuke, sar shaj te ove spremno meribase ko isavko stanje sar so inan akana!? To kalbi tano chucho nanetu nisavo Imani, pherdo sumnje isi tut (bash o Allah), na veruineja ko Tevhid, nanetu Ikhlas (iskrenost), hem na djaneja te Devle! Teshko tuke! Naklan sa o granice hem ich sabri nane tut! (Jilal al-Kathir-Abdul Qadir Jilani, str. 167-168)
Palo akava o Abdul Kadir Djilani cherdja akaja dova: Rabbena attina fid-dunja hasseneten, ve fil Ahireti hasseneten, ve kina azaben nar (Kur’an 2:201). So znachini: O Allah, de amen shukaripe ko akava Dunjaluko hem shukaripe ko Ahireti; hem arak amen tari i jag e Djehennemesiri.
Kova tano o shukaripe? So mislineja? O shukaripe nane ko barvalipe, ili ko status, ili ki inteligencija, ili bilo so Dunjaluchko. O Pejgamberi (salla’llahu alejhi vessellem) prokletindja odole manushe kova soj tano robi e Dunjaluchko barvalipase; hem isto phendja tano kaj akava Dunjaluko na vredini ni sar jek pag machakiri; pa sar shaj te phena kaj o barvalipe e Dunjalukosoro tano shukar? O Pejgamberi (salla’llahu alejhi vessellem) ine cherela Dove, molini ine e Allahe (Azze ve Djel) te zivini sar chorolo manush, te merel sar chorolo manush, hem te vazdelle o Allah (Azze ve Djel) taro meribe ko o Dive e Sudibasoro sar chorolo manush; a keda i Aisha (radijAllahu ‘anha) puchlale sose adjar cherela Dove, o Pejgamberi (salla’llahu ‘alejhi vessellem) phendja lake: “Cherava Dove adjar sose o chorole vernikija ka kuven ko Djenneti 40 bersh angleder o barvale.” (Tirmizi hem Bajhaki)
O Allah (Azze ve Djel) vacheri tano ko Kur’ani, kaj sa ko akava Dunjaluko tano iskushenie, na samo o barvalipe, nego chak o chave, hem o sastipe; a soj povredno anglo amare jacha nego o chave hem sastipe? Ama vechinom taro manusha pa ni na ceninena akava, pa keda nashalena e chaven hem o sastipe; on nashalena po Imani kompletno, ili pa djana ko Allah (Azze ve Djel) hem cherena Dove te cidel Lendar o Allah (AZze ve Djel) I teshkotija; a keda cidela lendar i teshkotija, odola manusha bistrena e Allahe (Azze ve Djel).
O setiba ko Allah (Azze ve Djel) ka cherel tumen posvesna; a o setiba ko meribe ka anel tumenge i dar e Allahestar, keda ka setinen tumen ko Allah (Azze ve Djel) hem keda ka setinen tumen ko meriba; tumen ka djanen o chachipe e Dunjalukosoro, hem o chachipe e Ahiretesoro. Pa o mo phral, setinentu ko Allah (Azze ve Djel) akana; dikheja li odova me so dikhava? A setin tut akana ko meribe, hem dik kozom bersha nakle kote tu zivindjan ko dalaleti? O Allah (Azze ve Djel) vichini tut; keda ka cide tutar sa soj Dunjaluchko ko kalbi, hem keda ka prave to kalbi o Allah (Azze ve Djel) ka pherel tut Nureja; pa ka dikhe te kalbeja odova so jachencar nashti dikhe. Setin tut ko Allah (Azze ve Djel); hem ava popashe ki Leste. Chede o djandipa kozom so shaj, hem praktikuin odova so siklovea; irantu ko Allah (Azze ve Djel), te kalbeja, a na mujea. Ava ko Allah (Azze ve Djel) hem cher odova so valjani te chere, cher o ibadeti kova so o Allah (Azze ve Djel) rodela tutar, hem o Allah rodela tutar odova za da te zashtitini tut ko o Dive e Sudibasoro; pa cher o ibadeti, pher to kalbi Takvaja, hem cher so shaj te cidetu taro loshnipe, taro haramija; hem taro odova so na zadovolini e Allahe (Azze ve Djel).
Keda ka dikhe te kalbeja o Dunjaluko, ka dikhe kozom tano loshno hem glupavo odova so tano preokupirimo e Dunjalukoja; pa iran tut ko Allah (Azze ve Djel), ko Allah tano o spas, a na ko Dunjaluko. O Djenneti, o Djenneti tano tuke ako nadiineatut ki Allahesiri Milost, pa irantu ko Allah!!
SELAM ALEJKUM!
One Comment on “O MO PHRAL!”
Odgovori
La Illahe Illa Allah – Nane nisavo aver devel osven (jek Devel) o Allah
Komentija
 | arif u O MO PHRAL! |
 | al Hikma wal Marifa u Bash o al-Hikma wal-Ma'ri… |
 | Iljas u Bash o al-Hikma wal-Ma'ri… |
 | Kajtazi Imer u al Hikma wal Ma'rifa – V… |
 | bilal 71 u al Hikma wal Ma'rifa – V… |
es-selamualejkum sarinence epralence mirencehem me penjencekoi taneko dini islam .cacukanei nekase o cacipe paro. osven okolen ce kola iceren pe ko ku.rani hen ko suneti. o islamii i ko procentija ko insani nekase i but anglale a nekasie palale.oimani parencare na cinelape nego zaradinipe a o rezultati kotar ti butii procentija kozom zaradijan odobor tute ka oveltut punkte .neka oallah cellesanuhu nekovel amen care e cororencare .neka arakimen kotar cororo candiba hem neka vazdel ki dereca uciza za teovelle iskrena vernikija kola lese dova ka ceren hem ki sesta ka peren .jarab primin amai dov e coro rengiri sose tu vcerercan najagleder ko ceneti tiro o corore ka kuven .cermen ko isibe core a ko ibadeti bavale ja rabi primin mi dova samo tut e nasloinavaman hem samo tutar rodava sose osven tutare averena canava .amin jarabbbi#